TIN LEH HRISELNA

Natna eng emaw kan neih hian kan taksa peng hrang hrangah hian a lang chhuak fo a. Ţawng thei ni se kan taksa peng hrang hrangte hian kan natna emaw, natna kan neih mai theih emaw te hi min hrilh tur a. Kan taksa hi kan chîk erawh chuan a hriat ve theih a. Kan tin aţang pawh hian eng natna nge kan neih, kan taksain eng harsatna nge a tawh tih te a hriat ve theih a, han tarlang teh ang. 
Tin dâng tak hi thisen tlakchham vang a ni thei a, thin natna vang a ni thei a, taksa mamawh tlakchham vang a ni thei a, lung natna chi khat congestive heart failure vang a ni thei bawk a ni. 
Tin lang vâr lutuk hi thin natna vang a ni thei a, a bik takin thin vûng (hepatitis) lang chhuak a ni thei a ni. 
Tin hmâwr éng hi pa ang natna, fungal infection vang a ni duh a. Tin fungal infection hi a zual zel chuan tin a ei chhe thei a, a khawk thei bawk a. Tin fungal infection hi tinea unguium tih a ni a, a awlsam zawngin tin ringworm tihna a ni mai e. Ringworm hi a awmna hmun azirin a hming hi a danglam a ni. 
Tin lang pawl deuh hi taksain oxygen a tlakchham vang a ni thei a. Hei hi chuap lam dik lo, emphysema vang te a ni thei a. Lung lam ţhat loh vang pawhin tin a lang pawl thei a ni.
Tin thap, khuar chik chek leh bawl deuh hrup hi vun natna chi khat psoriasis vang a ni thei a, ruhseh vang a ni thei bawk a. Tin a lang duk deuh thei bawk a. Psoriasis hi vun natna dam har tak a ni a, Gilead Thinghnai lehkhabuah psoriasis chungchang hi ka ziak nghe nghe a ni. 
Tin hmâwr ro, kak leh keh hi thyroid ţhalbe natna nen a inkungkaih fo a. Tin hmâwr éng deuh erawh tin fungal infection vang a ni duh thung a ni. 
Tin bul vela vun sen leh vûng hi lupus natna vang a ni thei a, natna hrik awm (infection) vang a ni thei bawk a. 
Tin hnuaiah a duma inrìn a awm chuan inentir tur a ni. Hei hi vun cancer, melanoma vang a ni thei a ni. 
Tin seh chîng hi an awm a, a chîng dawklak chuan an tin an seh bul deuh vek fo a. Tin seh hi chîn dawklak vang bâkah rilru lam natna, a bik takin anxiety disorder vang a ni thei a ni. Tin sen chîn hi obsessive-compulsive disorder nen a inkungkaih ve fo bawk a ni. 
Kan tin awm dan hi a inthlak danglam ve fo a. Tin awm dan inthlak tam ber hi natna vang a ni kher lo a, thil awm thei leh ni thei ka han tarlang a ni e.Sources:whatsapp

Be the first to comment on "TIN LEH HRISELNA"

Leave a comment

Your email address will not be published.


*


Share