VLADIMIR PUTIN LEH KIM JONG-UN-TE INBIA

Russia President Vladimir Putin leh North Korea hruaitu Kim Jong-un-te chu nimin khan  Russia ram lawng chawlhna hmunpui Vladivostok khuaah an inbia a, ram pahnite inlaichinna țha zawk leh inzawmna nghet zawk neih an tum thu an puang.
Russia ram sorkar thuchhuak chuan ram hruaitu pahnihte hian North Korea nuclear ralthuam nuai bo dan tur chungchang an sawi dun niin a tarlang. 
Vietnam ram khawpui Hanoi-ah khan US President Donald Trump leh North Korea hruaitu Kim Jong-un te inbiakna a hlawhchham a, Kim Jong-un hian Russia ram țanpuina a dil ta a ni ber mai. 
Russian presidential spokesman Dmitry Peskov chuan North Korea nuclear ralthuam chungchang hi chu ram 6; North Korea, South Korea, China, Japan, Russia leh US te nen chinfel chi niin a ngai tih a sawi a. He ram 6-in North Korea nuclear ralthuam chungchang an sawihona hi kum 2013 khan bui lung tawk ang hlauhvin a khawk a, an chhunzawm leh hleithei ta lo a ni. Ram țhenkhat-ten North Korea ram nuclear ralthuam nuai bo dan tur an ngaihtuah a, North Korea hian nuclear ralthuam nuai bo tak tak a duh a ni phawt chuan kawng a awm turah kan ngai a, nuclear ralthuam nuai bo a nih chuan N. Korea leh S. Korea inkar buaina hi chin fel a ni thei dawn a ni, a ti. 
BBC Laura Bicker chuan, ‘N. Korea hruaitu hian US țanpuina tel lo pawhin a khawsa thei tih entirnan Russia ramah a zin niin a ngaih theih a ni,’ a ti. Kim Jong-un hian Russia President hnenah hian UN Security Councilin N. Korea ram an sanction sut țhen sak turin a ngen bawkin an ring a ni. 
North Korea chuan Hanoi inbiakna a hlawhchhamna chhan kha US Secretary of State Mike Pompeo vang a ni an ti a, chuvangin Mike Pompeo hi US President Donald Trump hian thlak se, mi dang mi fimkhur zawk dah turin a phut thu N.Korea sorkar media te chuan an lo tarlang tawh bawk a ni. 
Cold war vanglai khan Soviet Union kha North Korea ram țanpuitu bulpui ber a lo ni țhin a, kum 1991-a Soviet Union a keh chhiat hnu khan Russia leh N.Korea ram inlaichinna a țha ta vak lo va, China ram a lo lian ta bawk a, N. Korea chuan China chu rin pui berah a neih chho ta a. President Putin kaihhruaina hnuaiah Russia ram sum leh pai dinhmun a lo țha chho leh ta a, Putin hian N.Korea-in Soviet Union hnena a leiba tam tak chu kum 2014 khan a thai bo sak a ni. 
An communist ram pui ni mah se, Russia leh China pawh hian N.Korea-in nuclear ralthuam a nei tur hi an duh vak lo a ni. 
Korea ram pahnih inkara buaina chingfel tur hian Russia leh China ramte hi an pawimawh a ni. Russia President Vladimir Putin hian North Korea hruaitu Kim Jong-un hi biak a duhna a rei tawh a, mahse President Donald Trump nen an inbiak țhin avangin Russia President hi puan angin sirah an hnawl fo țhin a, Kim Jong-un a beidawn takah chuan Russia President bawk chu a pan leh ta nge nge a ni. Kim Jong-un hian thlawhna a chuang ngam lo a ni mai thei, a tih dan pangngai bawkin rêl awmkhauh (armoured train) bawkin Vladivostok khua hi Nilaini khan a pan a ni…Sources:whatsapp

Be the first to comment on "VLADIMIR PUTIN LEH KIM JONG-UN-TE INBIA"

Leave a comment

Your email address will not be published.


*


Share